Секој ден во Македонија се отвораат нови болни прашања. Одговорите обично треба да ги дава власта, ама јавноста обично и не добива одговори.
Во последно време и западните дипломати во земјава почнаа да поставуваат отворени прашања. На пример холандскиот амбасадор Дирк Јан Коп на македонска телевизија беше директен со прашањата.
– Неопходните реформи можеа да бидат направени пред 10-15 години, а не беа направени. Прашањето е каде се милијардите, каде се и што се случи со обуките што ги спроведувавме? Зошто сите нови правила и регулативи не се правилно имплементирани? Дали е тоа прашање на менталитетот?, истакна и праша холандскиот амбасадор.
Ги слушна ли актуелната македонска Влада прашањата од амбасадорот, ќе има ли конкретен одговор? На пример вицепремиерите Гриби и Маричиќ може да објаснат зошто не се спроведуваат реформите, а и каде се парите. Нека си одберат кој на кое прашање ќе одговори и двајцата се експерти и се на важни функции. И двајцата на македонската јавност цело време им даваат објаснувања дека се се работи во корист на Македонија.
Овие две прашања се на место, добро се конципирани од амбасадорот и не треба да се одолговлекува со одговорот.
А треба да се одговори и на прашањето околу менталитетот. Не е до крај јасно дали дипломатот мисли на менталитетот на министрите или на менталитетот на сите македонски граѓани.
Затоа можеби одговорот би бил најсоодветен со контра прашањa:
А кои и чии дипломати не така одамна ги учеа македонските политичари дека можат да истераат некои болни работи за Македонија (како она за името) на „балкански и рационален начин“? Има ли тоа сега влијание кај опуштеноста на нашите политичари и во други прилики да си тераат на балкански начин?
Впрочем токму холандскиот амбасадор неодамна порачуваше на македонската јавност „треба да се затне носот и да се голтнат уставните промени“. Па можеби нашите министри исто така си велат: „треба сите да го затнат носот и да голтнат како ние ја раководиме земјава“?
Очигледно е дека: Треба сите да се вратат на вистинските европски стандарди. Сите. Само, на таков начин најдобро ќе се гради вистинскиот „менталитет“ на оние кои раководат со Македонија.
И да расчистиме, менталитетот на огромниот дел од населението во Македонија не е ист со тој на политичарите. Кај граѓаните само понекогаш има сосема друга фалинка во менталитетот која најчесто на самите нив им се удира од глава.