Македонскиот шампион Еурофарм Пелистер загуби од Металопластика Шабац со 27-26 во третото коло од групната фаза на меморијалниот турнир „Крсте Андоновски“, но и покрај поразот останува на првото место и ќе се бори за трофејот.
Битолчани отворија лошо и имаа негатива од 4-0, па Александар Јовиќ мораше да бара тајм-аут. За пет минути македонскиот шампион направи комплетен пресврт и успеа да поведе преку Куманоски од пенал, 5-4.
Но тимот од Шабац остана во егал, 6-6, а потоа и по двете промашувања на пелистерци стигна до плис два, 8-6. Се зачестија грешките во напад на македонскиот тим, па некогашниот европски првак поведе и со плус три, 14-11.
До крајот на полувремето битолчани не успеаја да ја намалат негативата, напротив Шабац побегна и на плус четири кои беа актуелни на стартот, па на пауза се замина со 16-12 за српскиот тим.
На стартот на вториот дел се играше гол за гол, па беше 17-13, пред Кузманоски и Борзаш да намалат на 17-15, а битолчани преку двете крила погодија и за израмнување, 17-17.
Нападот на битолчани се размрда со влегувањето на Ѓорговски и битолчани по подолго време го преземаа водството, 21-20, кога имаше да се игра уште петнаесетина минути.
На двете страни имаше по неколку промашувања и немаше голови пет минути, пред Дамјановиќ да израмни на 21-21. Србите имаа и плус два, 26-24, а бркаа победа од четири гола за второ место во групата.
Беше и 27-25, кога Арсиќ запре шут на пелистерци, имаа гостите и шанса за плус три, но не ја искористи, па Цехте казни за 27-26 на шеесетина секунди до крајот. Битолчани добија шанса и за реми, но Петровиќ не успеа да реализира.