Ракометарите на Бутел Скопје ја запишаа првата победа на меморијалниот турнир „Крсте Андоновски Усташ“, откако по поразот од Еурофарм Пелистер, го победија некогашниот европски првак Металопластика Шабац со 28-27. Македонскиот тим заслужено славеше против српскиот, откако во најголем дел од мечот имаше контрола на резултатот.
Во првите десетина минути блескаше на голот Александар Стојаноски и бутелци успеаја да стигнат до предност од плус три, 6-3. Тоа беше причина стратегот на Металопластика, Владан Матиќ, да побара тајм-аут.
Имаше Бутел и плус четири, 7-3, но Брајовиќ намали на 7-4. Проблем за македонскиот тим беше и повредата на десниот бек Николов, кој го свитка зглобот. Избраниците на Горан Кузманоски не попуштаа во ритамот и ја одржуваа предноста.
Стојаноски продолжи да брани одлично и беше 10-6 по дваесетина минути игра. Следуваа промашувања на двете страни, пред Цветковски да зголеми на 11-7, а беше пропуштена прилика за плус пет.
До крајот на полувремето Металопластика успеа да искористи две грешки и намали на 12-10, а веќе на стартот на полувремето успеа и да израмни на 12-12. Сепак Бутел не се предаваше и успеа да се врати во водство.
Во продолжение се играше гол за гол, а на десетина минути до крајот на мечот, по двете интервенции на голманот Блажески, македонскиот тим стигна до плус три, 22-19, преку младиот Цветковски.
Погоди и кадетскиот репрезентативец Субашевски за 25-22, но српската екипа анулираше два гола, 25-24, кога останаа да се играат уште пет минути до крајот. Ѓеоргиевски прво погоди за 26-24, а потоа изннуди и пробивање.
Иваниќ, екс членот на Металопластика, а сега на Бутел, со шут од далечина зголеми на 27-25. Потоа српските ракометари почнаа да играат пресинг, намалија на 28-26, имаа и напад, но Блажески одбрани, па потоа немаше време за нешто повеќе.
Следете не на нашата страница на Facebook и бидете дел од Viber заедницата на 24Ракомет и добивајте ги сите информации веднаш на вашиот телефон.
Можете и да коментирате, да ги кажете вашите размислувања под секоја објава на веста на Вибер.