Младинската женска репрезентација на Македонија денеска го стартува настапот на Светското првенство во Скопје.
Селекторот Дарко Јанев вели дека главната цел е да се помине групната фаза и дека ќе се оди чекор по чекор.
„Нашата репрезентација ќе настапи во мешан состав, а тоа ќе бидат девојки од генерацијата 2004/2005, како и перспективните ракометарки од генерацијата 2006/2007. Не очекуваат низа интересни и тешки натпревари против најдобрите светски репрезентации. Ќе бидам скромен и внимателен и не сакам да ветувам ништо. Нашата прва цел е да ја минеме групата. Ќе одиме чекор по чекор и ќе се трудиме од натпревар во натпревар да бидеме сѐ подобри“, вели Јанев.
Нашата селекција имаше проблеми со играчкиот кадар и нема да играат Дукоска, Јанкуловска, Коловска, Нестороска, Велкова…
„Имавме големи проблеми. На СП ќе ни недостасуваат и тоа многу повредените играчи Нестороска, Коловска, Дукоска, Велкова…кои беа предводници на оваа генерација. На првенството нема да сметам ниту на Јанкуловска која заработи скршеница на стопалото“, заврши Јанев.
Прв предизвик за Македонија ќе биде селекцијата на САД, денеска од 20:15 часот, а мечот се игра во СЦ „Борис Трајковски“. На 21 јуни, Македонија ќе се соочи со Исланд, а на 22 јуни ќе игра против Ангола.