Последниот натпревар од групната фаза на турнирот „Крсте Андоновски“ за Бутел значеше нов пораз откако по Еурофарм Пелистер беше совладан и од екипата на Татран од Прешов со 32-25 (16-16). Натпреварот го одлучи финишот на првиот и средната на вториот дел. Во првиот дел Татран се врати од негатива од шест голови, а во средината на второто успеа да го скрши отпорот на скопскиот суперлигаш и да го одведе натпреварот во своја полза.
Гостите од Прешов со два прецизни удари го отворија овој натпревар, во наредните осум минути се играше гол за гол, а од 11 минута Бутел ги презема конците во свои раце. Со низа од шест погодоци во само пет минути дојдоа до висока предност од „плус шест“ за 11-6, на средина на првиот дел. Разликата порасна за еден гол во 19.минута (13-7), но во финишот на полувремето Прешов имаше доволно сили да намали пет гола од високата предност и да ја врати неизвесноста на овој дуел. Точно на почетокот на 30.минута Митал го израмни резултатот на 16-16.
На почетокот на вториот дел Татран ја врати минималната предност од почетокот на дуелот, а разликата се задржа до средината на вториот дел. Во 42 минута гостите од Словачка успеаа да врзат неколку погодоци во низа и ги искористи промашувањата на Бутел (од пенал линијата) за да дојде до највисока предност од 21-19 во 44.минута.
Како натпреварот се доближуваше кон финишот, падна темпото, особено кај ракометарите на Бутел. Затоа разликата продолжи да се зголемува до највисоки 28-21, во 55.минута. Кога беа познати победниците на овој дуел, во мирна завршница се чекаше само финалниот резултат кој гласеше 32-25.
Татран Прешов ќе го чека резултатот од натпреварот меѓу Металопластика и Еурофарм Пелистер за потврда на местото во дуелот за бронза, исто како и Бутел кој ќе чека дали ќе го избегне последното место во групата Б.
